من صد عنك بالرخاء وأنت مشتد
أصحا تعده بالشدايد رفيقي
ومن لا يقدرنا إلى وصلت الحد
خله يولي يبتعد عن طريقي
شفي على اللي رفقته كنه السد
عنده علومي وسط بيرٍ عميقي
أشفق على هد القطامي إلى هد
يصيد ما يفلس وطلعه حقيقي
يوم الرفاقه بين جزره مع المد
ضاع الفكر يا صاحبي ما يطيقي
وأنا صحيبي من يبادلني الود
وقلبه على حب المراجل شفيقي
ما هوب نمامٍ ولاهوب ملحد
باقي على العشرة وعهده وثيقي
قرمٍ شجاعٍ لا نخيته على الجد
يفزع وصدره يا عرب ما يضيقي
هذا رفيقي راعي الطيب إلى عد
طيب المراجل واعتبرته شقيقي
وربي على فعل المخاليق يشهد
وكلن يحلل رفقته يا رفيقي
الإثنين أغسطس 04, 2008 9:12 pm
